محمد الجارحي يكشف لأول مرة: مصادر تمويل بوابة يناير

مقال الكاتب محمد الجارحي، بوابة يناير

أنا شاكك في بتوع بوابة يناير دول، وتوقيت طلوعهم يقلق، والفار بيلعب في عبي، أكيد حد وراهم وممولين، لا لا أكيد العيال دي أجندة، يا إما هم إخوان متنكرين، لا لا العيال دي مخابرات ومخبيين، بس أنا فاهم الفولة أكتر منك، العيال دي شكلها مريب، لا إخوان ولا مخابرات دول فلول أساساً.

ريح دماغك، العيال دي لا إخوان ولا فلول ولا مخابرات ولا عسكر، العيال دي صوتها من دماغها، صحفيين ما بيخافوش غير من ربنا، مستبيعين، وقفوا ضد مبارك، والمجلس العسكري، ونزلوا ضد الإخوان، ودلوقتي شايفين إن الصحافة الحرة حق أصيل من مكتسبات ثورة 25 يناير، علشان كده عملوا بوابة يناير، بعد ما التطبيل ملا البرميل.
بوابة يناير النهاردة عمرها أسبوعين بالتمام والكمال، في أول أسبوع كانت 5 فضائيات بتنقل عنها، لكن بدايتها المعقولة خلت ناس تفتي وتنظر، وعلى طول بدأ الهجوم واحنا لسه بنقول يا هادي، طب استهدوا بالله شوية، التقيل لسه جاي ورا، دا احنا لسه في فترة البث التجريبي!

محمد الجارحي

من باب الشفافية مع القارئ، اللي له الفضل في نجاح البوابة من عدمه، ومن باب إننا مش على راسنا بطحة، قررنا نقر ونعترف بمصادر تمويل بوابة يناير وأمرنا إلى الله :-
 أول حاجة كانت مرحلة التخطيط للبوابة ودي كلفتنا قعدتين فيهم شاي ووجبة فراخ من أم 16 جنيه من بوفيه نقابة الصحفيين
 حجزنا الهوستينج بمبلغ ضخم 96 دولار أي ما يعادل 750 جنيه دفعتهم منى سليم مدير تحرير الموقع من جيبها الخاص
 الدومين الخاص بالموقع الحمد لله أخدناه منحه لا ترد في العرض المجاني اللي كان معمول ع الهوستينج
 المهندس اللي بيعمل الموقع دفعناله 500 جنيه عربون علشان يصمم ويبني الموقع وبرضه دفعتهم منى سليم من جيبها الخاص
 بدأنا شغل في الموقع يوم 19 ديسمبر 2013 وكان انطلاق البث التجريبي يوم 1 يناير 2014
 الحمد لله ربنا أكرمنا وقدرنا ندبر للمهندس اللي بيصمم الموقع 200 جنيه أخدهم بعد 10 أيام من بدء البث التجريبي ولسه علينا ليه 800 جنيه وبنفكر نقنعه يتبرع بيهم لوجه الله والوطن
 كنا محتاجين خط انترنت وده قدرت أوفره اشتركنا في باقة 100 جنيه وخلصت في يومين وبعدين رفعناها إلى باقة سوبر بـ 250 جنيه حتة واحدة
 بخصوص الإمداد والتموين الحمد لله كنا من وقت للتاني بنشتري الشاي والسكر وربنا أكرمنا بـ “كاتل” حل الأزمة لإن مفيش بوتاجاز، واللي كان بيجوع كان بينزل يضرب واحد كشري من عند أبو طارق .
 د.هشام جبران ده صاحب الشقة اللي كنا قاعدين فيها والحقيقة الراجل عمل فينا جميل كبير، لإننا كنا مشردين، بس يوم 15 يناير قررنا ناخد شقة بتاعتنا احنا وتقاسمنا دفع إيجارها والرزق بتاع ربنا محدش ح يموت من غير عشا.
 وفرشنا الشقة الجديدة بخمس ترابيزات الواحدة بـ 110 جنيه و10 كراسي فخيمة شوية الواحد بـ 105 جنيه وكمان 5 كراسي بلاستك الواحد بـ 31 جنيه.
 ونظراً للامكانيات المالية الضخمة تعاقدنا مع بعض الكتاب يكتبوا بلوشي وبأنتهز الفرصة دي علشان أشكرهم على التمويل الجميل
 الخلاصة محدش شغال في البوابة دي أو كتب فيها مقال أخد منها مليم وشايلين المشروع ومؤمنيين إنهم ح ينجحوا ومش خايفين
 البوابة دي مش ملك حد، ومملوكة للي شغالين فيها، وقريباً ح تبقى مملوكة لمن يكتبون فيها ويعملون فيها، ومش بعيد نعمل اكتتاب شعبي ليكون نسبة منها مملوكة للقراء وبكده ح تكون أول مؤسسة صحفية بهذا النوع.
قبل ما أفوتكم بعافية لازم أشكر صديقي عمرو بدر اللي ما فقدش الأمل وما غيرش مبادؤه، ومحمود السقا صاحب اقتراح اسم يناير، ومنى سليم أول ممول للمشروع، والمهندس عماد عوف اللي يا رب يتبرع بباقي حقه وكل زمايلي اللي بيتسحلوا كل يوم في الشغل ورفع الأخبار بدون مقابل، ونفسي أكتب أساميهم واحد واحد بس ملحوقة إن شاء الله.
لو لسه شايف إننا ممولين أو إخوان أو فلول أو أجندة إنت حر، إحنا بس حبينا نقولك إننا مكملين، ومكاسب يناير مش ح تضيع، ومحدش ح يقدر يكسر الجيل ده، وح تلاقونا طالعين نقول للأعور إنت أعور في عينك حتى لو كان السيسي، ولا مرسي ولا مبارك أو الجن الأزرق، ونوعدكم نعمل صحافة حرة مهنية قدر ما نسطيع.
من الآخر..يناير صحافة مش خوافة