الفنان نيمو : جرافيتي شوارعنا

الفيلم الوثائقى (شوارعنا) عن فن الجرافيتي بمصر بعد ثورة 25 يناير، يتضمن الفيلم لقطات اثناء رسم بعض رسومات نيمو

شوارعنا

وجهة نظر ( نيمو) تجاة وسائل الاعلام في هذا الشريط الصوتي

مقابلة صوتية بين

نيمو – فنان الجرافيتي المصري

بريرة رشيد – طالبة بجامعة بيركلى .كاليفورنيا

حوار مع نيمو

نص الحوار

ما اسمك؟ كم عمرك؟ واين تسكن؟

نيمو..21 سنة من المنصورة

كيف بدات حركة الجرافيتي بمصر ؟ وكيف كانت قبل الثورة ؟ وهل كان للجرافيتي السياسي والاجتماعى وجود قبل الثورة؟

لو هنتكلم عن الجرافيتي في مصر ف العصر الحديث فالجرافيتي بدأ مع بداية حركة الاولتراس في عام 2007 .. قبل الثورة كان فية غضب من النظام القديم فلذلك كان فية رسومات سياسية ورسومات اجتماعية قبل الثورة .. بعد الثورة استمرينا على اللي بدأناه لكن بعمق وتوسع اكبر .. وبدأنا نعرف الناس يعني اية جرافيتي .. في اول ايام الثوره كنا بندعي الناس للنزول لحد لما الناس بدأت تقع بدانا نرسم الشهداء والمصابيين ونحاول نوثق دا على الجدران

هل كنت مشارك في اي حركة سياسية قبل الثورة ؟ وكيف كان الوعي السياسي ؟

كان فية وعى سياسي بس مش زي بعد الثورة طبعا الوعى السياسي زاد عند المصريين كلهم لكن كمشاركتي في حركة سياسية لا مكنتش مشارك ودي حاجة انا مبسوط منها اني كنت مشارك ف الثورة من الايام الاولى بدون المشاركة في اي حركة او تيار

كيف بدأت فن الشارع الجرافيتي ؟

انا بدات الموضوع من الاول عن طريق الانترنت كنت بشوف رسومات لفناني الجرافيتي المشاهير زي بانكسي تبدأ تتفرج بقا الناس دي بتعمل اية ودا لاني بحب الرسم من صغري .. بدأت اقرا عن الجرافيتي اكتر واعرف اية هي الادوات والتقنيات اللي ممكن تفيدني

ومرة في مرة بدأت انزل الشارع فعليا دا في اخر عام 2008 وهنا بدأت الصدامات مع الشارع

هل يوجد اي تنظيم لفناني الجرافيتي او هيئة مرتبة بأي شكل من الاشكال ؟

لا

هل توجد بمصر محموعات تربط فناني الجرافيتي اعتمادا على المكان او اسلوب الرسم ؟

فية مجموعات في القاهرة والاقصر زي تكتل وطلبة فنون جميلة الاقصر مكونين كرو

هل تتوقع ان يتوقف او يختفى فن الجرافيتي في وقت لاحق ؟

مظنش لان الجرافيتي من الفنون المغطاة او زي مابنقول الاندرجراوند فممارسة الجرافيتي مش مرهونة بقوانين من الاساس وانت بادئ الموضوع وعارف ان انت هتحتك بالشارع وبالعقليات .. فالموضوع ماهو الا فكرة

ماهي المواضيع التي يناقشها فن الجرافيتي قبل وبعد الثورة ؟ وما دورة في الثورة ؟

قبل الثورة مثلا كنا بناقش قضايا زي الظلم وارتفاع الاسعار في بدايات الثورة كان دورنا اننا ندعي الناس للنزول ونعرف الناس اية هي مطالب الثوار ونحاول نوصلهم ان الثوار مش اجندات او بلطجية كما يقال بعد الثورة هنحاول نساعد الحكومات الحالية .. ولو فية تجاوزات من اي قطاع هنتكلم عنها ونوضح ان التجاوزات دي ممكن تؤدي الى اية

هل من الممكن ان تشرح لنا بعض رسوماتك؟

عن المجلس العسكري , انهم يكذبون كما يتنفسون .. الحرية لمعتقلى السجون العسكرية .. الشهيد علاء عبدالهادي مش بلطجي .. انقذوا الصومال

الشهيد محمد جمال سليم اول شهداء المنصورة والجرافيتي دا موجود في ميدانة لانهم اطلقوا اسمة على الميدان القريب من منزلة

ماهي الاماكن التي تفضلها وقت الرسم بشكل عام ؟

انا بحدد مكان الرسم على اساس ان بعض الرسومات بيبقى ليها تأثير اكبر في اماكن معينة ..ولازم اول حاجة يبقى المكان ظاهر زي موقف او متحرك زي قطر مكان بيعدي علية ناس كتير لان هما دول رواد فني

بحاول ان اكتر عدد ممكن يقدر يشوف شغلى .. اول يوم ممكن اخد مقاسات المكان دي عشان ابقا عامل تخيل للشكل النهائي وتاني يوم بنزل ارسم

من هم الاشخاص الذين تفكر بهم وقت الرسم وتريد ايصال فكرة الجرافيتي اليهم؟

في رسائل وموضوعات بتكون محددة بتحاول توصلها لافراد معينة ..ولكن في الغالب انا بكلم رجل الشارع العادي اللي معندوش قابلية في زيادة معرفتة او ثقافتة وانه مثلا يشتري جرنال واحد رايح شغلة بتوصلة الفكرة في ثانية .. حاجة متاخدش وقت لاني بعتبر نفسي اعلامهم

وماهو رد الفعل الذي تريده من مشاهدي فنك ؟

رد الفعل في مصر دلوقتي بيتختلف من فرد لاخر ممكن في بعض الاحيان يوصل انة يبوظ شغلى كلة وفي الحالة دي ببقا مبسوط اني وصلت الرسالة والفكرة اللي انا برسم ليها ولكن في بعض الاحيان حد يجي يرسم جنبي في قضية معادية لقضيتي بس الموضوع نادرا لما بيحصل ..لكن في الغالب اللي بيحصل بيكون شخبطة او مسح للشغل كلة

ماهي امنياتك واحلامك تجاة مصر ؟

زي اي واحد بيحب بلدة .. انا لما برسم برسم علشان بلدي في الاول والاخر وعلشان اسيب حاجة في الدنيا كفنان مصري .. احاول أعرّف اهل بلدي بثقافة جديدة ولكن مفيش اي استفادة لشخصي انا بفيد بلدي والفن فقط

الجرافيتي في مصر الى الان فن نفدي للاحوال السياسية والاجتماعية على عكس الرسم التعبيري في الخارج فبحاول اخلى النقد دا نقد بناء افيد بيه بلدي