الفنان الطبيب شريف عادل، أثناء عمله

الشعب المصري معروف بأنه شعب “نكتة” يحب الضحك و السخرية، وفي أوقات كثيرة يعتبرها سلاح و طريقة الهجوم الخاصة به. هكذا يفعل رساموا الكوميكس والكاريكاتير، فهم يصيغون أفكارهم و معتقداتهم و مبادئهم في مربع أو عدة مربعات حوارية بشخصيات مميزة و حوارات تصف الواقع. الكوميكس الأمريكية، المانجا اليابانية، و المانهوا الكورية، كلها وسائل عالمية و تُعد فن و مجال عمل و دراسة بحد ذاتها، قد لا يعتبرها العديد من العرب و المصريين كذلك، و لكن الإنترنت بدأ بمساعدتهم على فهمها، و أصبح هنالك العديد من رسامي الكوميكس العرب و المصريين المهرة، الذي يرقون لمستوى عالمي. أحد هؤلاء هو شريف عادل أو كما يلقب نفسه “رجل البرباطوظ” وهو طبيب أسنان و لكنه بدء مسيرة رسم الكوميكس ليصبح أحد أهم رسامي الكوميكس المصريين، ,ويمكنكم متابعة أعماله وأخر تجديداته بزيارة موقعه من هنا. وكان لي معه هذا الحوار:

شريف عادل أو “رجل البرباطوظ” كما رسم نفسه

“رجل البرباطوظ” قدم لنا نفسك.

شريف عادل, بني ادم مصري. بشتغل كطبيب اسنان و رسام\كاتب كوميكس.

طبيب أسنان و رسام كوميكس، إزاي جمعت بين الإتنين؟

طبيب اسنان كدراسة و شغل, الرسم كان هواية من زمان لكن عمري ما حاولت اخدها جد غير من قريب لما ابتديت برباطوظ كوميكس

إيه اللي خلاك تبدأ في مجال رسم الكوميكس؟ هل فيه حاجة أو حدث معين حفزك لكده؟

انا بحب الكوميكس جدا من و انا صغير, بعتبرها من اجمل الطرق اللي ممكن توصل بيها قصة او فكرة للناس. الكام سنة اللي فاتوا (يمكن من بعد الثورة), اعتقد حصل طفرة ابداعية في مصر, في مجالات فنية كتيرة, منهم الكوميكس. ابتدت الناس تهتم بيه اكتر و بقيت اشوف شغل كتير من مصر علي مستوي عالي. يمكن دي حاجة حفزتني اني اتعلم و انشر شغلي.

إيه رأيك، كرسام كوميكس، في رسامي الكوميكس و الكاريكاتير هنا في مصر؟ من حيث مستواهم و أفكارهم و طريقتهم؟

معظمهم مبدعين و بتابع شغل ناس كتير بصورة منتظمة. يمكن اول حاجة جت في دماغي دلوقتي مجلة توكتوك, بتعجبني جدا و مبسوط ان فيه مجلة كوميكس مصرية مش موجهة للأطفال و فيها تشكيلة كبيرة من الافكار و طرق الرسم.

أحد الكوميكس التي كتبها و رسمها شريف عادل

بس اسم”برباطوظ” مميز، إيه المغزى من الإسم و إخترته ليه؟

فكرت في كذا اسم وقتها كنت بختار منهم, برباطوظ عجبني عشان حسيت انه اسم غريب و الناس سهل تفتكره.

الاسم صعب حد ينساه فعلاً  .بقالك دلوقتي تقريباً سنتين بترسم كوميكس، هل طرأت عليك شخصياً وعلى أسلوبك أي تغييرات؟

اتعلمت كتير جدا جدا علي المستوي التقني و برضه ادبيا. انا مؤمن جدا ان الواحد مبيتعلمش اي حاجة كويس غير لما بيمارسها, بالذات في المواهب الفنية, اعتقد ناس كتير ممكن تبقي مش راضية عن شغلها فتقول انا هستني لحد ما شغلي يبقي كويس بعد كدة هبقي اخد الموضوع جد. يمكن ده اللي كنت بعمله زمان, لحد ما اكتشفت ان الخبرة مبتجيش غير بالممارسة. تاني حاجة اني ابتديت اتعرف علي ناس من المجال ده, و دي برضه حاجة بتخلي الواحد يتعلم اسرع و يبقي عنده حماس.

ادبيا اسلوبي اتحسن كتير, بقرا بانتظام عن فن الكوميكس عامة و الكتابة لها, و بحاول احسن من نفسي.

بحكم متابعتك، شايف مستوى إنتاج الكوميكس في مصر عامل إزاي مقارنة بالإنتاج الأمريكي أو الياباني مثلاً؟

مع الاسف ضعيف جدا بالمقارنة, لكن مش لضعف الموهبة. امريكا و بالذات اليابان, الكوميكس كفن جزء من ثقافتهم. مع الاسف غالبية المصريين لسة عندهم اعتقاد ان الكوميكس و الرسوم المتحركة حاجة للاطفال. يمكن الانترنت من الحاجات اللي ابتدت تغير الفكر ده شوية.غير كدة معندناش مؤسسات و دور نشر عملاقة زي في امريكا و اليابان, هنا الموضوع لسة محدود. بس زي ما قلت الدنيا ابتدت تتغير و التقدير ابتدي يزيد للنوع ده من الفن.

دمج شخصيات المانجا اليابانية و الكوميكس الأمريكية و السياسية المصرية، في عمل مصري مميز.

أتمنى في مرحلة ما نقدر نوصلهم، نتكلم عن الثقافة الأسيوية، سواء فن المانجا أو الأنيمي، هل تأثيرها عليك و على رسمك كبير؟

بصورة كبيرة اه. انا اكتشفت الانيمي اعتقد و انا في ثانوي, و كنت منبهر جدا بالعالم الضخم اللي قدامي. اولا لازم اعترف ان طريقة رسم المانجا\الانيمي جميلة جدا باختلاف انواعها, فيها حاجة بتوصل احساس الشخصية ليك من غير افتعال, ده غير الخلفيات اللي بتبقي مليانة تفاصيل و مرسومة بدقة. تاني حاجة هي القصص نفسها, لما تكتشف ان قصص الكوميكس مش لازم بس تكون قصص اطفال او قصص سوبر هيروز, اكيد دي حاجة هتأثر عليك.

اعتقد الانيمي و المانجا اثروا علي طريقة تفكيري و كتابتي للكوميكس, اكتر من طريقة الرسم نفسها.

رسم الكوميكس بدأ معاك كهواية هل بتنوي تخليه وظيفة ثابتة؟

بإذن الله, انا معتبره وظيفة ثابتة و صعب اوي اتخلي عنه.

في الظروف السياسية و الإقتصادية دي، شايف أن فن الكوميكس يقدر يعبر عنها؟

الكوميكس, الكاريكاتير, الجرافيتي, من اكتر الحاجات اللي بتعبر عن الواقع بالذات في ظروف زي اللي احنا فيها. عشان كدة باعتبر ان الثورة خلقت جو ابداعي مكانش موجود بالصورة دي قبل كدة.

هل بتواجه أحيانا صعوبة في انك توصل رسالتك أو مغزى رسمك للناس؟

بشكل كبير لأ, الكوميكس اللي بعملها اغلبها فكرتها بسيطة و مباشرة. يمكن الموضوع يختلف بالنسبة للكتاب اللي شغال فيه, لسة هكتشف.

أسلوبك في الرسم مميز، هل في عوامل أو رسامين معينين أثروا على أسلوبك؟

اكبر عامل هو الكوميكس اللي كنت بقراها و انا صغير. خالد الصفتي في فلاش, حاكم في مجلة كاريكاتير, محلة ميكي, كوميكس مارفل و دي سي.

هل بتعرف توازن بين شغلك كطبيب وكرسام كوميكس؟ وخصوصاً لما تبقى رسام بصفة ثابتة؟

لما ابتديت برباطوظ كوميكس, كان بعد لحظة قررت فيها اني مش لازم اختار بين الاتنين, و اني ممكن اعمل الاتنين في نفس الوقت. الموضوع صعب بس مش مستحيل.

هل فيه نصيحة تقدر تقدمها لرسامين الكوميكس الجدد؟

اتعلم بالممارسة, ارسم كتير جدا و وري شغلك لاكبر عدد من الناس تقدر توصله. لو انت مش راضي عن شغلك دلوقتي مع الوقت و المجهود اكيد هتوصل لمستوي تفخر بيه.

أخيراً، كلمنا عن مشروعك القادم.

هو كتاب كوميكس (جرافيك نوفل) عبارة عن قصة خيالية اعتقد تتصنف كوميدي-سياسي. شغال فيها بقالي فترة و تقريبا خلصت 1\5 منها. قريب هبتدي ادور عن دار نشر ليها باذن الله.

إحنا في إنتظارها طبعاً، شكراً على الحوار الممتع ده.

الشكر ليكي.

Tweet